العمر في لحظات

أفريل 3, 2008 عند 8:57 م | أرسلت فى شئ من حياتي | 6 تعليقات

يالله ما بعرف كانو الزمن قرب ينتهي

صايرة عم حس الساعة ثانية

واليوم ساعة

والاسبوع يوم

والشهر اسبوع

وهيك انو شو السبب ما بعرف

بس يمكن السبب هو الفراغ الي بحياتي وانا ما عم اعرف ملي

عم حاول حاليا ملي بس انشا الله تكون طرق تملاية وقتي صحيحة

احيانا بقعد برجع للماضي بحياتي وبتذكر ايام طفولتي كانت ايام مافيها غير اللعب والفرح

ما كان عندو الانسان هموم بتذكر ايام ما كنت اطلع العب بالطابة والكلال

صحي انا وصغيرة كنت اشبه الصبيان بلعبون انو كل البنات كانو يلعبو بالباربي

الا انا كنت العب الكلال والطابة

حتى انو انا كبرت وبقيت العب العاب الصبيان الاكبر متل البسكليت والمتورات وهيك

بتذكر كل ما مر صبي من حارتنا الي بالمصيف وقفو واستأجر منو متورو

ايام الواحد بيحب يتذكرا ويسترجع اديش كانت حلوة

اه واه على ايام النوم الساعة 9المسا

كنت ارجع من اللعب تعبانة حط راسي ونا

اما هلق اي اذا بنام الساعة 6الصبح بيكون منيح كتير

انا حاليا عم حاول نظم حياتي من جديد

بس ايام بتمر على الانسان بيكون فيا كتير مزعوج بس بيحاول يغير

وهيك بقى دائما ماما كانت تقلي الله يرحم ايام زمان وقت الي ما كان في وسائل تسلية وكانوينامو بلا كهارب

وكانو مع كل هاد يتسلو

اما هلق نحنا متوفرلنا كل وسائل التسيلة ومع هيك منبقى مالين

6 تعليقات »

RSS feed for comments on this post. TrackBack URI

  1. أيام الطفولة مستحيل تنتسى

    يمكن لما كنا صغار ما كنا حاسينها حلوة، بس لما نكبر بتحلى بعينا!

    بس شو ما صار ما لازم نعيش بالماضي .. الماضي خلص شي مضى ..

    عيشي لحظتك .. وحبيها .. ودايما انت يلي فيكي تخلقي ذكريات حلوة .. حتى بينك وبين حالك

    Comment by fatosha— أفريل 4, 2008 #

  2. اي والله من كثر ما بيحكولنا عن أيام زمان عنجد بتمنى أرجع عيش فيها .. هلأ وقت نسمع قصصهن منضحك من قلبنا على بساطة تفكيرن وحياتهن .. بس أيامهن كانت شغلة ..

    أيامنا نحنا صفيت ضياعة بفضاء الذبذبات والإلكترونيات .. أحياناً بتمنى روح اسكن بشي قرية نائية بس كون بعيد عن الضجة يلي ما لها طعمة ولا نقاء ولا راحة ..

    Comment by مستر بلوند— أفريل 6, 2008 #

  3. مستر بلوند وفتوشة اولا شكرا الكون
    تانيا مافي احلى من ذكريات الطفولة
    ومن ايام زمان انا بتمنى ارجع عيش
    بلا كهربا
    عنجد يمكن الحياة بتكون احلا
    وتقعد على الحصير وتاكل زيتون شاي وصوبيا حطب
    انا هيك دائما بفكر
    بس للاسف التكنولوجيا بعدتنا عن هالشي

    Comment by nddo— أفريل 6, 2008 #

  4. معك حق يا نادين ، هالتكنولوجيا أبعدتنا عن كتير شغلات ، كتير أحيانا بحس حالي غريب.

    سلام

    Comment by Syrian Student— أفريل 8, 2008 #

  5. أيام الطفولة ما بتتنسي, وللآسف ما بترجع 🙂 😦

    Comment by أحمد نذير بكداش— ماي 3, 2008 #

  6. المسألة مو على وسائل الترفيه ..

    بل ثقافة الموجود والممنوع ..

    يعني زمان .. ما كانوا يشعرون بحسد وغيظ وقهر ومدري إيش .. لأنهم كلهم كانوا متقاربين في المعيشة وما كانت مظاهر الترف متوفرة ..

    لكن اليوم .. تتفاوت المستويات الاجتماعية والمادية بشكل كبير ..

    وصار الكل يريد يكون في القمة .. حتى الأطفال ..

    وبس 🙂

    Comment by مُـنِـيـرَة— جوان 4, 2008 #


أضف تعليق

المدونة على ووردبريس.كوم.
Entries و تعليقات feeds.